Líklega hafa fáir landsmenn upplifað eins slæman mánudag og Þorvaldur Jón Ottósson. Fréttablaðið í dag greinir frá því að hann sé með skaddaða heyrn eftir slys í gufu. Til að bæta gráu ofan á svart þá kom hann fyrr um daginn að bíl sínum stórskemmdum.

Þorvaldur segist vera fastagestur í sund en það var í gufunni í Suðurbæjarlaug í Hafnarfirði þar sem atvikið átti sér stað. Þar hrundi ofn gufubaðsins skyndilega á gólfið.

„Ég hef sótt þessa sundlaug reglulega í tvö ár og við vorum þarna tveir inni í gufubaðinu. Þetta er lítið rými með flísum og þetta var ekkert eðlilegur hávaði sem myndaðist þarna innandyra. Þetta var eins og sprenging og það þekki ég vel enda unnið sem jarðvegsverktaki og komið fyrir ófáum sprengihleðslum í gegnum tíðina,“ segir Þorvaldur.

Hann segist heppinn að ekki fór verr þó heyrnin hafi skaddast. „Við vorum í raun stálheppnir að slasa okkur ekki enn verr því að ef við hefðum setið á öðrum stað í klefanum þá hefði ofninn farið ofan á okkur. Það var lán í óláni,“ segir Þorvaldur.

Fyrr um þennan sama dag hafði Þorvaldur komið að bíl sínum á kafi í snjó. Svo virðist sem öllum snjó í nágrenninu hafi verið safnað saman og hent ofan á bílinn hans. Myndir af þessu má sjá á Fréttablaðinu.