Í einni falsfréttinni kemur fram að Ástþór Magnússon hafi fjárfest 150 milljónum í fyrirtæki sem segist nota sjálfvirka rafmyntarmiðlunarforritið Bitcoin Billionaire.
Í samtali við Fréttablaðið segir Brynhildur Pétursdóttir, framkvæmdastjóri Neytendasamtakanna, að fólk þurfi að passa sig.
„Fólk þarf að passa sig að vera alls ekki að kaupa Bitcoin í gegnum auglýsingar á Facebook. Það er svo mikið drasl á sveimi á Facebook og fólk þarf alltaf að vera vakandi þegar það er beðið um að gefa persónuupplýsingar og sérstaklega kortaupplýsingar. Það er alls engin gæðatrygging að fyrirtæki auglýsi á Facebook.“
Brynhildur rekst reglulega á þessar auglýsingar á Facebook en hún segir að fyrirtækið sé ekki að standa sig í að koma í veg fyrir svindl og falsfréttir.
„Það virðist ekki skipta neinu máli þó maður tilkynni svona ruglfréttir ítrekað. Facebook virðist ekki ráða við að stöðva svona lagað og reyndar hefur fyrirtækið beinlínis dregið lappirnar í mörgum tilfellum eins og dæmin sanna. Fólk þarf að vera sérstaklega gagnrýnið þegar það verslar á netinu og láta allt eiga sig sem lítur út fyrir að vera of gott til að vera satt.“
Ástþór er langt frá því að vera sáttur með að nafnið sitt sé notað í tengslum við netsvindlið. Hann hafði því samband við lögregluna vegna málsins í gegnum tölvupóst. Í tölvupóstinum til lögreglunnar óskaði Ástþór eftir því að lögreglan upplýsi Facebook um málið og stöðvi birtingu þessara falsfrétta.
„Um hreinan uppspuna er að ræða og tengist ég þessum aðilum eða þessu fyrirtæki ekki á nokkurn hátt hvorki fyrr né síðar. Þar sem svindlinu er dreift með auglýsingum á Facebook er þess óskað að lögreglan upplýsi Facebook að um svindl auglýsingar er að ræða og láti stöðva birtingu þeirra.“
Lögreglan svarar tölvupósti Ástþórs og segir að honum sé velkomið að senda inn kæru vegna málsins telji hann að brotið sé gegn honum. Í svari lögreglunnar segir að lögreglan geti ekki haft áhrif á hvað sé birt á Facebook.
„Skemmst er frá því að segja að Facebook er auglýsingamiðill sem er staðsettur í Bandaríkjunum og því miður getur lögreglan ekki haft áhrif á hvað er birt þar. Ég mæli því með að þú nýtir þér „report“ möguleika Facebook til að benda þeim á svikin og óska eftir að þetta sé fjarlægt.“
Ástþór er ósáttur með þetta svar lögreglunnar og segir að það væri einfalt mál fyrir lögregluna að láta stöðva þetta.
„Merkilegt að lögreglan stuðli að svona glæpastarfsemi sem reynir að blekkja peninga út úr almenningi á Íslandi. Facebook er orðinn stærsti samskiptamiðill landsins. Einfalt mál fyrir lögregluna að hafa samband við þennan miðil eða þau embætti þar sem fyrirtækið starfar og láta stöðva svona. Annað er fullkomið ábyrgðarleysi af lögreglunni.“
Ástþór er ekki á Íslandi, notar Facebook nánast ekkert og hefur því ekki fengið þessar auglýsingar um falsfréttirnar.
„Mér var sagt af fólki í gær að það hefði ekki getað tilkynnt þessar auglýsingar til Facebook sem svindl.“
Ástþór gagnrýnir aðgerðarleysi lögreglunnar en hann segist vera búinn að gera allt sem í hans valdi stendur til að vekja athygli á þessu.
„Það verður því að vera á ábyrgð aðgerðarleysis lögreglunnar ef einhverjir Íslendingar sogast inní þennan svikavef og tapa peningunum sínum.“
