Haraldur Davíðsson er eigandi gullfallegs Labrador-hunds sem heitir Herra Kolur. Haraldur og Kolur urðu fyrir afar ógeðfelldri reynslu að kvöldi föstudagsins langa er þeir voru á gangi niður Laugaveg. Hvítum Audi A4 bíl var ekið framhjá þeim, í bílnum voru tveir ungir menn, og annar þeirra skrúfaði niður hliðarrúðu og spreyjaði piparúða á hundinn og manninn.

„Ég áttaði mig ekki á því hvað hafði gerst fyrr en þeir voru farnir framhjá okkur. Ég varð skyndilega var við þetta ský fyrir framan okkur en það var ekki fyrr en ég fann bragðið af þessu að það rann upp fyrir mér hvers kyns var,“ segir Haraldur, sem eins og vænta má, er afar reiður vegna málsins en heldur þó stillingu sinni.

Haraldur blindaðist í stutta stund á öðru auga en náði að strúka efnið úr augunum án frekari eftirkasta. Hundurinn fór heldur verr úr árásinni en varð þó ekki fyrir varanlegum skaða: „Hann náði sér ekki fyrr en eftir að ég hafði vætt augun í honum upp úr mjólk og hlúð að honum og huggað hann,“ segir Haraldur.

Haraldur hefur reynt að grafast fyrir um hverjir voru hér að verki og hefur orðið nokkuð ágengt í þeim efnum. Ekki er þó hægt að gefa nánari upplýsingar um það fyrr en eftir páska þegar Haraldur er búinn að leggja inn formlega kæru hjá lögreglunni.

Haraldur ætlar líka að gefa Matvælastofnun (MAST) upplýsingar um málið en sú stofnun hefur meðal annars það hlutverk með höndum að kæra fyrir brot á dýraverndunarlögum.