Samgöngustofa hefur bent þeim farþegum sem eiga flug með WOW air að kanna flug hjá öðrum flugfélögum. Eins og greint var frá á níunda tímanum í morgun er WOW air hætt starfsemi og öll flug félagsins falla því niður.

„Samkvæmt viðbragðsáætlun munu flugmálayfirvöld kanna vilja annarra flugfélaga til að aðstoða farþega með svokölluðum björgunarfargjöldum í samræmi við yfirlýsingu Alþjóðasamtaka flugfélaga, IATA. Upplýsingum um það verður komið á framfæri við farþega jafnóðum og þær liggja fyrir. Jafnframt verður samkvæmt viðbragðsáætlun lagt mat á getu annarra flugfélaga til að mæta aukinni eftirspurn,“ segir í tilkynningu frá Samgöngustofu.

Þar segir enn fremur að tilkynningar til farþega verði uppfærðar þegar tilefni er til og meðal annars birtar á vef Samgöngustofu.

Þá birtir Samgöngustofa upplýsingar um réttindi flugfarþega. Þeir farþegar sem keyptu flugmiða með kreditkorti er bent á að hafa samband við útgefanda kortsins til að kanna möguleika á að fá flugmiðann endurgreiddan.

„Farþegar sem keyptu ferðina af evrópskum ferðaskipuleggjanda sem seldi flugmiðann sem hluta af svokallaðri alferð (þ.e. samsettri ferð þar sem flug er selt ásamt gistingu eða öðrum þjónustuþáttum) eiga rétt á heimflutningi á grundvelli samevrópskra reglna um alferðir. Farþegum er bent á að hafa samband við þann ferðaskipuleggjanda sem þeir keyptu ferð sína af.“

Farþegar kunna jafnframt að eiga kröfu á hendur WOW AIR, m.a. á grundvelli reglugerðar um réttindi flugfarþega. Þegar um gjaldþrot er að ræða þarf að lýsa slíkum kröfum í þrotabú flugrekandans.

Tilkynning Samgöngustofu til farþega WOW air:

Hvernig kemst ég á áfangastað?
Farþegum er bent á að kanna möguleika á flugi hjá öðrum flugfélögum. Athugið að sum flugfélög kunna við þessar aðstæður að bjóða farþegum aðstoð í formi björgunarfargjalda. Upplýsingar um þau félög verða birtar um leið og þær liggja fyrir.

Hver eru réttindi mín?
Farþegum sem keyptu flugmiða með kreditkorti er bent á að hafa samband við útgefanda kortsins til að kanna möguleika á að fá flugmiðann endurgreiddan.

Farþegar sem keyptu ferðina af evrópskum ferðaskipuleggjanda sem seldi flugmiðann sem hluta af svokallaðri alferð (þ.e. samsettri ferð þar sem flug er selt ásamt gistingu eða öðrum þjónustuþáttum) eiga rétt á heimflutningi á grundvelli samevrópskra reglna um alferðir. Farþegum er bent á að hafa samband við þann ferðaskipuleggjanda sem þeir keyptu ferð sína af.

Farþegar kunna jafnframt að eiga kröfu á hendur WOW AIR, m.a. á grundvelli reglugerðar um réttindi flugfarþega. Þegar um gjaldþrot er að ræða þarf að lýsa slíkum kröfum í þrotabú flugrekandans.

Hvar fæ ég nýjustu upplýsingar?
Tilkynningin verður birt og uppfærð með nýjustu upplýsingum hverju sinni á eftirtöldum stöðum:

– Vef Samgöngustofu: www.samgongustofa.is / www.icetra.is
– Vef Keflavíkurflugvallar: https://www.isavia.is/
– Vef WOW AIR: www.wowair.com
– Hengd upp á öllum viðeigandi flugvöllum.