Einar Bárðarson athafnamaður er mikill áhugamaður um umhverfismál en líkt og DV hefur áður fjallað um þá hefur hann stundað það að skokka og tína upp rusl. Þetta kallast að plokka og eina reglan er að það er bannað að kvarta undan rusli á víðavangi.
Nú er hann nánast orðlaus yfir matarsóun á Íslandi. „Þetta stingur í hjartað,“ skrifar Einar við mynd sem Vakandi, samtök sem vilja auka vitundarvakningu um sóun matvæla, deila á Facebook.
Þar má sjá innihald gáms, líklegast hjá einhverri verslun þó það sé ekki tekið fram. Gámurinn er stútfullur af matvælum sem virðast vel æt. „Ísland í dag / / enn finnast stútfullir gámar af vel ætum mat… og ekki er einu sinni haft fyrir því að flokka!!,“ segir í lýsingu.