Einar Bárðarson athafnamaður er búinn að fá nóg af sóðaskap, líkt og DV greindi frá í fyrra stundar hann það að skokka og tína upp rusl, heldur hann utan um Facebooksíðu þar sem hann hvetur aðra til þess sama. Þetta kallast að plokka og eina reglan er að það er bannað að kvarta undan rusli á víðavangi. Nú eru allt að 6 þúsund manns í hópi plokkara.
Sjá einnig: Einar Bárðar í rusli
Eftir áramótin liggja sprengdar skotkökur og kínverjaleyfar víða á víðavangi. Einar mætti í þáttinn Bítið á Bylgjunni og sagði mikið líf á síðunni nú eftir áramótin:
„Það er því miður þannig, að fólk virðist halda að það sé eðlilegt að skilja eftir, sérstaklega þessar stóru tertur, í töluverðum bunkum. Það er erfitt að setja sig inn í hugarheim þeirra sem finnst þetta í lagi.“
Það er búið að vera blautt á höfuðborgarsvæðinu frá áramótum og skotkökurnar orðnar að „einhverri pappadrullu“ ásamt leir í botninum á pappahólkunum og ekki geðslegt að týna þá upp. Þó að Einar sé ekki stórtækasti plokkari Íslands er hann tilbúinn í slaginn. „Ég er bara með eina svarta rúllu aftan í bíl og þegar maður keyrir fram á þetta þar sem maður ræður við, þá fer maður bara upp á kant og hendir skottertunum í pokann.“
Einar tók nokkrar skotkökur í morgun þegar hann var að keyra börnin sín í skólann. „Þar á umferðareyju var einhver slatti, við tókum það, þannig að þetta fer hægt og rólega.“