Lögreglan á höfuðborgarsvæðinu fékk tilkynningu um innbrot í geymslur í fjölbýlishúsi í Hlíðunum rétt fyrir klukkan 21 í gærkvöldi. Brotist hafði verið inn í fimmtán geymslur en ekki er vitað hverju var stolið. Ekki kemur fram í tilkynningu lögreglu hvort einhver eða einhverjir séu grunaðir um verknaðinn.
Gærkvöldið og nóttin var með rólegasta móti hjá lögreglu en fyrir utan þetta mál í Hlíðunum hafði lögregla afskipti af nokkrum ökumönnum sem voru ekki með allt sitt á hreinu. Tveir voru teknir vegna gruns um akstur undir áhrifum fíkniefna og einn vegna gruns um áfengis- og fíkniefnaakstur. Þá voru skráningarnúmer klippt af bifreið ökumanns sem stöðvaður var í Breiðholti í gærkvöldi þar sem bifreiðin reyndist ótryggð.