Laust fyrir klukkan 22 í gærkvöldi var tilkynnt að maður hefði fallið í Núpá í Eyjafirði. Hann var að vinna við stíflu í ánni þegar krapagusa hreif hann með sér að sögn lögreglunnar á Akureyri. Allt tiltækt björgunarlið var strax sent á vettvang auk læknis. Ferðin á slysstað sóttist seint vegna ófærðar og þurfti að fá snjóruðningstæki til að fara á undan.

Þyrla Landhelgisgæslunnar var send norður með fjóra kafara. Önnur þyrla Landhelgisgæslunnar er væntanleg til Akureyrar klukkan 04 með 10 manna hóp sem er sérhæfður í straumvatnsbjörgun.

Í tilkynningu, sem lögreglan sendi frá sér klukkan 03, kemur fram að nú séu 43 leitarmenn á 17 tækjum við störf á vettvangi, þar af 4 kafarar og einn læknir. Leitarhundur er einnig á vettvangi. Aðstæður á vettvangi eru erfiðar vegna myrkurs og veðurs. Ekki hefur verið unnt að nota þyrlu við leitina vegna éljagangs.

Í uppfærslu lögreglunnar klukkan sex í morgun kom fram að maðurinn væri enn ófundinn. Verið var að skipta út mannskap á leitarsvæðinu og kalla til frekari mannskap frá öðrum svæðum.

https://www.facebook.com/logreglannordurlandieystra/posts/2481258715459730