Eitt vinnuslys var tilkynnt til lögreglunnar á Suðurnesjum í vikunni. Í skeyti frá lögreglu segir að starfsmaður hjá fyrirtæki hafi verið fluttur á Heilbrigðisstofnun Suðurnesja eftir að hafa fengið borð á fótinn á sér.
Var maðurinn að hlaða blaðabunkum á borðið sem gaf sig undan þunganum og datt á fót viðkomandi. Starfsmaðurinn hlaut opið sár á ökkla og var honum komið undir læknishendur. Málið var tilkynnt til Vinnueftirlitsins, að sögn lögreglu.
Þá segir lögreglan á Suðurnesjum að 40 ökumenn hafi verið kærðir fyrir of hraðan akstur það sem af er vikunni. Flestir voru staðnir að verki á Sunnubraut í Reykjanesbæ. Einn sem ók á meir en tvöföldum hámarkshraða var sviptur ökuleyti til bráðabirgða á staðnum.
Þá voru ökumenn einnig staðnir að hraðakstri á Reykjanesbraut. Sá sem hraðast ók mældist á 128 kílómetra hraða þar sem hámarkshraði er 90 kílómetrar á klukkustund. Má sá eiga von á 115 þúsund króna sekt.