Tvær stefnur á hendur Arngrími Jóhannssyni og Sjóvá eru nú til meðferðar hjá Héraðsdómi Reykjavíkur. Bæði málin snúast um andlát Kanadamannsins Grant Wagstaff sem lést þegar Arngrímur brotlenti sjóflugvél sinni í Barkárdal þann 9. ágúst 2015. Dóttir Grant, Sarah Wagstaff, krefst 12 milljóna króna í bætur frá Arngrími og Sjóvá.

Fréttablaðið skýrir frá þessu. Haft er eftir Sarah að hún sé mjög vongóð um að jákvæð niðurstaða fáist í málinu fyrir vorið eða að minnsta kosti áður en næsta ár er úti.

Ekkja Grant, Roslyn Wagstaff, hefur einnig stefnt Arngrími og Sjóvá til greiðslu bóta.

Í stefnunni segir lögmaður Sarah, Jón Páll Hilmarsson, að Arngrímur hafi gert alvarleg mistök, þar á meðal hafi vélin verið ofhlaðin og röng ákvörðun hafi verið tekin um flugleið í slæmum veðurskilyrðum.

„Fráfall föður stefnanda er því bein afleiðing af þessari saknæmu og ólögmætu háttsemi stefnda, Arngríms.“

Segir í stefnunni þar sem segir einnig að samkvæmt veðurspá fyrir umræddan dag hafi verið ófært til sjónflugs norðanlands. Samt sem áður hafi Arngrímur ákveðið að fljúga sjónflug yfir Tröllaskaga.