„Stjórn Landssambands lögreglumanna telur ákvörðun dómsmálaráðuneytis um að fara fram á alhliða stjórnsýsluúttekt á embætti ríkislögreglustjóra löngu tímabæra“, segir í ályktun Landssambands lögreglumanna sem var send til fjölmiðla rétt í þessu.
Sambandið segir mikla óánægju hafa ríkt um langt skeið um störf yfirstjórnar embættis ríkislögreglustjóra.
„Óánægja þessi er m.a. til komin vegna fatamála lögreglumanna sem hafa verið í ólestri en einnig vegna annarra mála s.s bílamála. .Ljóst er að lögregluembætti hafa þurft að greiða háar fjárhæðir til bílamiðstöðvar ríkislögreglustjóra vegna ökutækja lögreglu, þrátt fyrir að þau séu jafnvel úr sér gengin, sbr. fréttir undanfarna daga. Einnig hafa málefni sérsveitar ríkislögreglustjóra verið til umfjöllunar og styður stjórn Landssambands lögreglumanna erindi þeirra sérsveitarmanna sem sent var dómsmálaráðuneyti til umfjöllunar.“
Jafnframt óskar stjórn Landssambands lögreglumanna þess að málið fái skjóta úrlausn, því annað gæti rýrt traust almennings á lögreglu.
„Stjórn Landssambands lögreglumanna telur að fái sá ágreiningur og sú gagnrýni sem beinst hefur að embætti ríkislögreglustjóra ekki skjóta úrlausn, muni það bitna á þjónustu við borgarana, öryggi þeirra og öryggi lögreglumanna á landsvísu. Slíkt ástand er til þess fallið að rýra traust almennings til lögreglu, sem lengi hefur haldist gott og dapurt væri að glata“