Mikið blíðviðri hefur verið sunnan og vestan lands um helgina en víða kaldara og rigning annars staðar á landinu. Á morgun má búast við sólarlausum hlýindum í Reykjavík, hægviðri og allt að 15 stiga hita. Sólskin verður hins vegar á Vestfjörðum og Vesturlandi en töluverð væta fyrir austan. Á Norðurlandi verður hægviðri og hiti eitthvað yfir 10 stigum. Samkvæmt veðurvef DV er núna 15 stiga hiti í Reykjavík, sólskin og hægviðri. Sömu tölur gilda fyrir Ólafsvík og er það mesti hiti á landinu í augnablikinu.
Á þriðjudag ætti að vera komið glampandi sólskin aftur í höfuðborgina.
Veðurhorfur næsta sólahring samkvæmt Veðurstofunni eru eftirfarandi:
Norðaustan 3-10 m/s og súld eða rigning austantil. Skúrir annarsstaðar fram eftir kvöldi, en þurrt og bjart veður á Breiðafirði og Vestfjörðum. Skúrir um vestanvert landið síðdegis á morgun og styttir upp austanlands annað kvöld. Hiti frá 8 stigum við norður- og austurströndina, upp í 18 stig á Suðvestur- og Vesturlandi.
Veðurhorfur á landinu næstu daga:
Á þriðjudag:
Austan og norðaustan 3-10 og skýjað, en bjart með köflum og stöku skúrir suðvestantil. Hiti 10 til 18 stig, hlýjast vestanlands.
Á miðvikudag:
Norðaustan og austan 8-13 m/s. Rigning, einkum norðan- og austanlands en úrkomulítið norðvestantil. Hiti 10 til 16 stig.
Á fimmtudag:
Norðan 8-13 og rigning, en hægari og stöku skúrir sunnanlands. Hiti 10 til 18 stig, hlýjast á Suðurlandi.
Á föstudag:
Austlæg eða breytileg átt og rigning í flestum landhlutum. Hiti 8 til 15 stig, hlýjast sunnanlands.
Á laugardag:
Norðvestan og rigning með köflum, en þurrt suðvestanlands. Hiti 6 til 15 stig, hlýjast á Suðurlandi.