Útlit er fyrir því að raforkuskortur verði innan þriggja ára. Þetta kemur fram í nýrri skýrslu frá Landsnet um afl- og orkujöfnun fyrir árin 2019 til 2023. Segir þar að notkun almennings og stórnotenda leiði til þess að líkur á aflskorti verði komin yfir viðmiðunarmörk árið 2022.
Þetta stafar meðal annars af því að úttekt frá flutningskerfinu muni aukast meira en áður var reiknað með. Við útreikningana var ekki horft til nýrrar stórnotkunar nema þar sem búið er að ganga endanlega frá öllum samningum um orku og tengingu við flutningskerfið.
Gagnaverum hefur fjölgað hratt á landinu undanfarin ár. Árið 2023 eru líkur á að aflskortur verði í rúmlega 15 klukkustundir ef um er að ræða kaldan vetrardag en rúmlega 5 klukkustundir í venjulegu ári.
Myndin að neðan sýnir áætlaða uppsetta aflgetu framleiðslueininga ásamt áætlaðri eftirspurn eftir afli yfir tímabilið. Eins og sést á myndinni dregur saman með uppsettu afli og eftirspurn eftir því sem líður á tímabilið samkvæmt þeirri þróun í notkun sem spáð er í nýjustu útgáfu Raforkuspár.