Karlmaður á fimmtugs aldri var í Landsrétti í gær dæmdur til 9 mánaða óskilorðsbundinnar fangelsisvistar fyrir manndráp af gáleysi, líkamsmeiðingar af gáleysi og fyrir brot gegn umferðarlögum.

Þann 24. júní 2016 ók maðurinn á ónýtri bifreið, ofsahraða, undir áhrifum sljóvgandi lyfja aftan á fólksbifreið.  Fólksbifreiðin kastaðist við höggið yfir á öfugan vegarhelming og hafnaði framan á smárútu. Ökumaður fólksbifreiðarinnar lét lífið í árekstrinum og farþegi smárútunnar slasaðist.

Ökuníðingurinn játaði fyrir dómi en við ákvörðun refsingar var litið til þess að hann ætti langan sakaferil að baki. Hann hafði ítrekað verið sviptur ökuréttindum fyrir að aka undir áhrifum áfengis og fíkniefna.

Landsréttur þyngdi með dómi sínum refsingu mannsins, en áður hafði hann verið dæmdur í Héraðsdómi Norðurlands eystra til 8 mánaða fangelsis en af þeim 8 mánuðum áttu sex að vera skilorðsbundnir. Því var Landsréttur ósammála og taldi að með tilliti til sakaferils mannsins, meðal annars, væru engar forsendur fyrir því að skilorðsbinda dóminn. Verður  honum því gert að sæta 9 mánuðum í fangelsi.

Áhugavert er þó að maðurinn var einungis sviptur ökuréttindum í eitt ár.  DV hefur nýlega fjallað um annan ökuníðing sem var svipt ökuréttindum ævilangt fyrir ítrekuð brot gegn umferðarlögum. Hún hafði þó aldrei banað manneskju með níðingshætti sínum.

Sjá einnig: 

Bryndís trylltist á Hótel Íslandi: Braut 12 vínflöskur og skemmdi tölvu