Enn á ný takast bræðurnir Einar S. Ólafsson og Rúnar Laufar Ólafsson á á flugeldamarkaðinum. Einar rekur Alvöru flugelda í Akralind og Rúnar Stóra flugeldamarkaðinn við Smiðshöfða. Athygli vekur að Rúnar notar skilti merkt Alvöru flugeldum til að auglýsa sinn markað. Til að byrja með ráku bræðurnir saman flugeldasölu en það samstarf varði aðeins í eitt ár.

Brugðust illa við

DV hefur áður fjallað um samkeppni bræðranna og tóku þeir þá báðir illa í spurningar blaðamanns. „Finnst þér þetta upphefjandi fyrir þig sem persónu?“ sagði Einar og „Hættu að búa til þvælu,“ sagði Rúnar.

Einar kom Íslendingum fyrst fyrir sjónir sem barn með hinu geysivinsæla lagi „Ég vil ganga minn veg.“ Hann átti þó ekki eftir að ílengjast í tónlistinni heldur gerðist síðar bifvélavirki. Einar komst aftur í deigluna þegar hann gekk í það heilaga í Krossinum með annarri barnastjörnu, Hönnu Valdísi Guðmundsdóttur, sem söng svo ljúflega um Línu langsokk í eina tíð. Minna hefur farið fyrir Rúnari á opinberum vettvangi.

Umdeildur bransi

Barátta bræðranna er langt því frá að vera eini barningurinn þegar kemur að flugeldamarkaðinum. Lengi vel hefur staðið styr milli björgunarsveitanna annars vegar og einkarekinna flugeldasala hins vegar. Vilja sumir meina að það séu hrein drottinsvik að kaupa ekki flugelda af björgunarsveitunum. Hafa þó íþróttafélög og önnur félagasamtök sem selja flugelda sloppið að mestu við gagnrýni.

Einnig eru fleiri og fleiri að komast á þá skoðun að flugelda eigi að banna alfarið. Þeir sem beita sér fyrir banninu gera það á grundvelli umhverfissjónarmiða, dýraverndar og lýðheilsusjónarmiða. Enn virðist þó sem flestir Íslendingar vilji halda í þennan sið og benda á að fjöldi útlendinga komi til landsins gagngert til að fylgjast með brjálæðinu.