Nú er byrjað að hvessa af suðaustri og verður stormur eða súld víða sunnan- og vestanlands þegar kemur fram á morguninn. Er því rétt hjá fólki að fara varlega, einkum nærri fjöllum á Suður- og Vesturlandi en þar geta öflugir vindstrengir myndast með tilheyrandi hviðum.

Þetta segir í hugleiðingum veðurfræðings á heimasíðu Veðurstofunnar sem víkur einnig að Norður- og Austurlandi í hugleiðingum sínum.

„Á Norður- og Austurlandi er hann heldur hægari og lengst af þurr, en óvenju hlýtt er á landinu miðað við að kominn er miður desember og má reikna með að hiti fari vel yfir 10 stig í hnúkaþey fyrir norðan. Þetta væri í sjálfu sér kærkominn ylur í skammdeginu, nema að fannfergi er í Eyjafirði, jafn vel víðar á Norðurlandi og þegar hlánar myndast vitaskuld leysingarvatn, sem vonandi á greiða leið í fráveitukerfin. Við skulum því óska þess að norðanmönnum takist að hreinsa vel götur, gangstéttir og niðurföll þ.a. leysingin valdi ekki vandræðum og eignatjóni.“