Þjóðvegi 1 hefur verið lokað milli Hvolsvallar og Víkur annarsvegar og í Öræfum hinsvegar, milli Núpstaðar og Jökulsárlóns, samkvæmt tilkynningu frá Umferðarstofu. Gul viðvörun er í gildi frá Veðurstofunni vegna hvassviðris með suðurströndinni. Nær vindurinn hámarki með morgninum og undir hádegi. Undir Eyjafjöllum er meðalvindur allt að 25 m/s og hviður 40 m/s. Svipað í Öræfum við Sandfell og lægir ekki að gagni fyrr en eftir 15-16 í dag.
Þokkalegt veður verður á höfuðborgarsvæðinu dag, allt að fimm stiga hiti, en nokkuð hvöss austanátt. Hlýnandi veður er um allt land. Þurrviðri verður í flestum landshlutum nema rigning með fram suðurströndinni og slydda eða snjókoma á Austfjörðum.
Rauðar hitatölur eru ráðandi um sunnan- og vestanvert landið næstu daga en hiti um og undir frostmarki í öðrum landshlutum.