Þann 9. maí síðastliðinn birti Amal Fathy myndband á Facebook þar sem hún deildi reynslu sinni af kynferðislegri áreitni, vakti athygli á umfangi vandans í Egyptalandi og gagnrýndi stjórnvöld fyrir að vernda ekki konur. Hún gagnrýndi einnig stjórnvöld fyrir atlögu þeirra að mannréttindum, bág kjör í landinu og lélega opinbera þjónustu.
Í kjölfarið var hún handtekin. Lögreglan réðst inn á heimili hennar að nóttu til þann 11. maí, handtók Amal og færði á lögreglustöð í Kaíró ásamt með manni hennar, Mohamed Lofty, og þriggja ára barni þeirra. Hann er fyrrverandi rannsakandi hjá Amnesty International og núverandi framkvæmdastjóri Egypsku mannréttindanefndarinnar. Mohamed og barnið voru látin laus úr haldi þremur klukkustundum síðar.
Saksóknarar skoðuðu mál hennar samdægurs og úrskurðuðu að henni skyldi haldið í varðhaldi í fimmtán daga í tengslum við rannsókn á ákæru fyrir að „birta myndband sem inniheldur falskar fréttir og gæti raskað almannareglu“.
Nánar er fjallað um málið á heimasíðu Íslandsdeildar Amnesty International og þar er hægt að skrifa undir áskorun um að Amal Fathy verði látin laus úr fangelsi.
