Myndband sem sýnir bónda á Íslandi afhausa hænsni á sérstaklega hrottalegan hátt fer nú eins og eldur í sinu á samfélagsmiðlum. Þar má sjá bónda slá höfuð af hæsni og öskra „hausinn af“. Myndbandið hefur vakið óhug, sérstaklega meðal þeirra sem eru vegan, en því hefur verið deilt bæði á Snapchat og Facebook. Enn er ekki vitað hvaðan á Íslandi myndbandið á uppruna sinn eða hversu gamalt það er. Myndbandið má sjá hér fyrir neðan.
Innan hópsins Vegan íslands er myndbandið fordæmt. „Þetta er ÓGEÐSLEGT!,“ segir einn meðan annar segir: „Þetta er algjör helvítis viðbjóður. Svo reynir fólk í alvörunni talað að sannfæra mann um að það sé farið svo vel fyrir hænum hérna á Íslandi. Helvítis andskotans ógeð.“
Adam Birkir er einn þeirra sem hefur deilt myndbandinu á Snapchat. Hann segist hafa deilt myndbandinu til sýna hve illa væri farið með dýr á Íslandi. Hann segist ekki vita uppruna þess en hefur nú fjarlægt það: „Mér fannst þetta ósmekklegt þannig ég ákvað að setja þetta í „story“,“ segir Adam.
