Í sviðsmyndagreiningu sem stjórnvöld unnu í lok sumars vegna mögulegra áfalla í rekstri WOW air, sem átti þá í fjárhagslegum erfiðleikum, kemur fram að ef flugfélagið yrði gjaldþrota gæti það leitt til tveggja til þriggja prósenta samdráttar í landsframleiðslu. Gengi krónunnar gæti veikst um allt að 13 prósent og verðbólga gæti tvöfaldast og orðið um sex prósent.

Fréttablaðið skýrir frá þessu í dag. Það var starfshópur á vegum fjármálaráðuneytisins, forsætisráðuneytisins og Seðlabankans sem gerði umrædda sviðsmyndagreiningu að sögn Fréttablaðsins.

Blaðið segist hafa heimildir fyrir að í grunnsviðsmynd greiningarinnar hafi verið gengið út frá því að gjaldþrot WOW air gæti orðið til að útflutningur myndi dragast saman um 10 prósent á næsta ára, að verðbólgan hækkaði um þrjú prósentustig og að um 1.400 manns myndu bætast á atvinnuleysisskrá.