Rennslið í Skaftá við Sveinstind var komið í 1.350 rúmmetra á sekúndu rétt fyrir klukkan tíu í morgun og var þá enn í vexti, en þetta kemur fram á vef Veðurstofunnar. Þá hafði vatnshæð aukist um 430 sentímetra á nítján klukkustundum.
Rennslið virðist enn vera að aukast við Sveinstind, þótt ferillinn hafi beygt af og sjálfsagt sé vatn nú farið að renna út í hraunið þannig að taka verður rennslistölum með varúð. Í hlaupinu 2015 var aukning vatnshæðar um 570 cm á 25 tímum og mælirinn sýndi rúmlega 2000 rúmmetra á sekúndu við hámarkið.
Ríkislögreglustjóri hafði gripið í gær til veglokana vegna hlaupsins úr eystri Skaftárkatli og, í samráði við Lögreglustjórann á Suðurlandi, lýsti yfir óvissustigi almannavarna.
Flogið verður yfir svæðið í dag og nánari upplýsingar verða gefnar síðar. Enn gætu því verið nokkrir klukkutímar í hámarkið við Sveinstind í hlaupinu sem nú stendur yfir.