Síðdegis í gær fann lögreglan í Kolding á Jótlandi í Danmörku 35 ára karlmann og tvö börn hans, þriggja og fimm ára, látin í íbúðarhúsi í bænum. Lögreglan hefur ekki viljað tjá neitt um málið annað en að hún sé þess fullviss að um börn mannsins sé að ræða.

Unnið hefur verið að rannsókn málsins síðan í gær. Lögreglan reiknar með að senda frá sér tilkynningu um málið þegar líður á morguninn. Ekstra Bladet hefur eftir varðstjóra hjá lögreglunni í Kolding að um hörmulegt mál sé að ræða.

Í fréttatilkynningu sem lögreglan sendi frá sér í gær kemur fram að unnið sé að rannsókn málsins en ekki sé hægt að veita frekari upplýsingar að svo stöddu vegna rannsóknarhagsmuna.

Húsið hefur verið afgirt síðan í gær og sérfræðingar lögreglunnar hafa verið við rannsóknir í og við húsið.