10 metra djúp og full af rusli
Í vikunni fannst dularfull hola nærri smábænum Tonopha í Arizona. Íbúar furða sig á því hvaðan holan kemur og bandarískir fjölmiðlar fylgjast grannt með gangi mála. Hector Thompson og móðir hans Michele gengu fram á holuna síðastliðin þriðjudag.
Mæðginin segja að þrátt fyrir stærð holunnar, sem er 10 metra djúp, hafi engin varúðarskilti eða borðar verið við holuna til að loka svæðinu. Hver sem er hefði þannig getað dottið ofan í hana.
Michele segir í samtali við KTVK að þeim hafi verið mjög brugðið og hringt á lögregluna. Þá segir Hector að hún sé augljóslega mjög gömul og hafi verið full af rusli.
Lóðin, sem holan er á, var í eigu Flugmálastofnunar Bandaríkjanna á sjötta áratugnum en er nú í umsjá stofnunar (BLM) sem sér um að viðhalda landsvæðum í eigu ríkisins.
Í frekari fréttum um málið hefur komið í ljós að Flugmálastofnunin vissi af holunni en enginn virðist þó vita af hverju hún var steypt og í hvað hún er notuð.
Þá þykir það nokkuð merkilegt að enginn íbúi á svæðinu hafi áður gengið fram á holuna. Í gær var fyllt upp í holuna með steypu til að koma í veg fyrir slys á fólki.
