„Páll er í fullum rétti til að segja sína skoðun á þessu,“ sagði Bjarni Benediktsson, verðandi forsætisráðherra, við fjölmiðla fyrir utan Bessastaði nú fyrir skömmu. Hann var af fréttamönnum spurður hvort hann teldi að Páll Magnússon yrði til vandræða á kjörtímabilinu en Páll, oddviti flokksins í Suðurkjördæmi gagnrýndi Bjarna opinberlega í morgun fyrir val sitt á ráðherrum en enginn þingmaður í flokksins kjördæminu verður ráðherra í nýrri ríkisstjórn. Hann sagði að ráðherraskipanin væri lítilsvirðing gagnvart Suðurkjördæmi og hann væri henni andvígur.

Bjarni sagðist skilja óánægjuna vel. „Ég skil vel að sá mikli stuðningur sem flokkurinn nýtur í Suðurkjördæmi kalli á að fólk vilji fá sína fulltrúa að ríkisstjórnarborðinu. En það verður að velja og hafna og þetta varð niðurstaðan.“

Hann sagði að Páll hefði verið málefnalegur í gagnrýni sinni, bæði opinberlega og við hann persónulega. „Ég veit að Páll er tilbúinn til að taka þátt í að styðja þessa góðu ríkisstjórn.“ Hann sagði aðspurður að fráfarandi ríkisstjórn hefði ekki alveg notið sannmælis. „En ég held að tíminn muni fara góðum orðum um hana.“

Rætt var við fleiri ráðherra. Gunnar Bragi Sveinsson, fráfarandi sjávarútvegs- og landbúnaðarráðherra, sagðist þakklátur fyrir þann tíma sem hann var í ríkisstjórn. Spurður um nýja ríkisstjórn sagði hann: „Ég hef ekki mikla trú á að þeir afreki mikið.“

Sigurður Ingi Jóhannsson, fráfarandi forsætisráðherra, sagði að Framsóknarflokkurinn yrði harður, málefnalegur, skynsamur og myndi leggja gott til í stjórnarandstöðu á komandi kjörtímabili. Hann væri ánægður með þann árangur sem næðist hefði.

Viðtöl við stjórnmálamennina má sjá á vef RÚV.