fbpx
Sunnudagur 13.júní 2021
Fréttir

VG aftekur stjórn með Sjálfstæðisflokki

Enginn vilji fyrir slíku samstarfi hjá áhrifafólki innan flokksins – Segir fátt af stjórnarmyndunarviðræðum

Ritstjórn DV
Þriðjudaginn 8. nóvember 2016 08:08

Ekki missa af Helstu tíðindum dagsins í pósthólfið þitt

Lesa nánar

Enginn vilji er til þess ­innan Vinstri grænna að vinna með ­Sjálfstæðisflokknum í ríkisstjórn. Kenningar um að áhrifafólk innan Vinstri grænna rói nú að því að byggja brýr milli flokkanna tveggja eru algjörlega úr lausu lofti gripnar. Þær eru aðeins til þess fallnar að styrkja stöðu Bjarna Benediktssonar, formanns Sjálfstæðisflokksins, í stjórnarmyndunarviðræðum hans við Viðreisn og Bjarta framtíð. Þetta herma öruggar heimildir DV úr röðum Vinstri grænna.

Síðustu daga hefur þrálátur orðrómur gengið um að unnið sé að því innan bæði Sjálfstæðisflokks og Vinstri grænna að finna fleti á stjórnarsamstarfi flokkanna. Vitað er að innan Sjálfstæðisflokksins er áhugi á að láta reyna á slíkt samstarf. Hins vegar er sá áhugi enginn meðal forystufólks Vinstri grænna. Katrín Jakobsdóttir, formaður flokksins, sagði í samtali við DV að engin breyting hefði orðið á þeirra afstöðu sem hún hefði lýst, bæði fyrir kosningar og eftir. Hún vilji reyna að mynda stjórn til vinstri.

„Almennt er það vilji flokksfólks að mynduð verði fimm flokka stjórn til vinstri.“

Órofa samstaða í þingflokknum

Bjarkey Olsen Gunnarsdóttir, þingkona Vinstri grænna, segir að órofa samstaða sé í þingflokki Vinstri grænna og standi hann heilshugar á bak við Katrínu formann flokksins. Katrín hefur ítrekað lýst því yfir að lengst sé á milli Vinstri grænna og Sjálfstæðisflokks í málefnalegu tilliti og engar stjórnarmyndunarviðræður séu í farvatninu.

Andrés Ingi Jónsson, nýkjörinn þingmaður Vinstri grænna, tekur í sama streng og Bjarkey. „Almennt er það vilji flokksfólks að mynduð verði fimm flokka stjórn til vinstri. Það hljóti að vera stjórnin sem reynt verður að mynda, nái Bjarni Benediktsson ekki að mynda stjórn til hægri og Katrín fái þá stjórnarmyndunarumboðið.“ Andrés bætir því við að hann viti ekki til þess að nokkur áhrifamaður í Vinstri grænum sé þeirrar skoðunar að ganga eigi til samstarfs við Sjálfstæðisflokkinn eins og staðan er núna.

DV ræddi við fjölda fólks í Vinstri grænum auk þeirra sem hér er getið að framan. Voru svör allra á sömu leið.

Áhugi er innan Sjálfstæðisflokksins á að mynda ríkisstjórn með VG. Margir Sjálfstæðismenn þrýsta mjög á að það verði gert.
Valdatafl Áhugi er innan Sjálfstæðisflokksins á að mynda ríkisstjórn með VG. Margir Sjálfstæðismenn þrýsta mjög á að það verði gert.

Mynd: DV ehf / Sigtryggur Ari

Langvarandi stjórnarkreppa gæti breytt stöðunni

Mikið var gert úr því í gær að Steingrímur J. Sigfússon, þingmaður Vinstri grænna og fyrrverandi formaður flokksins, hefði opnað á samstarf við Sjálfstæðisflokkinn í samtali við Morgunblaðið. Sagði Steingrímur efnislega í þeirri frétt að ef mál myndu flækjast mikið og hér yrði stjórnarkreppa myndu Vinstri græn auðvitað ekki skorast undan þeirri ábyrgð að koma að stjórn landsins, jafnvel með Sjálfstæðisflokki þótt langt væri í milli í áherslum flokkanna. Áhrifafólk innan Vinstri grænna tekur í sama streng aðspurt. Ef hér myndi ríkja stjórnarkreppa um langan tíma hlytu menn að þurfa að skoða aðkomu að ríkisstjórn með öðrum huga en nú er. Það ætti við um alla flokka.

Grétar Þór Eyþórsson, prófessor í stjórnmálafræði við Háskólann á Akureyri, segir að Steingrímur hafi einungis verið að segja það sem öllum hljóti að vera ljóst. „Ef það gengur ekki saman milli manna í fyrstu og annarri umferð í stjórnarmyndunarviðræðum, þá hljóta menn að meta stöðuna upp á nýtt.“

Lítil tíðindi um helgina

Lítil tíðindi urðu um helgina síðustu hvað varðar stjórnarmyndunarviðræður og ekki fengust upplýsingar í gær um gang mála í viðræðum Bjarna Benediktssonar við forsvarsmenn annarra flokka. Enn er almennt talið líklegast að Bjarni muni reyna að mynda ríkisstjórn með Viðreisn og Bjartri framtíð. Ekki náðist í formenn flokkanna þriggja við vinnslu fréttarinnar, þrátt fyrir ítrekaðar tilraunir.

Grétar Þór segir að þrátt fyrir að ekki hafi verið mikið að frétta af viðræðum um helgina þurfi ekki að útiloka að viðræður hafi átt sér stað. „Menn hafa kannski einsett sér að reyna að vera sem minnst í fjölmiðlum. Mér kemur reyndar nokkuð á óvart að þessi helgi hafi liðið án þess að það hafi neitt markvert komið fram. En auðvitað er staðan nú flóknari en hefur verið um langa hríð. Það er engin tveggja flokka stjórn í spilunum og þriggja flokka stjórnarmynstrin eru ýmist veik eða langt er á milli í málefnum. Menn ætla því líklega að vanda sig og það tekur tíma.“

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Nýlegt

Fréttir
Fyrir 2 dögum

Kona sakfelld fyrir að stela tæplega hálfri milljón af Foreldrafélagi Njarðvíkurskóla

Kona sakfelld fyrir að stela tæplega hálfri milljón af Foreldrafélagi Njarðvíkurskóla
Fréttir
Fyrir 2 dögum

Hjúkrunarfræðingur í mál við Akureyrarbæ – Sökuð um mistök við lyfjagjafir og sérkennilegan frágang á líki

Hjúkrunarfræðingur í mál við Akureyrarbæ – Sökuð um mistök við lyfjagjafir og sérkennilegan frágang á líki
Fréttir
Fyrir 2 dögum

Íslendingar missa sig yfir stærsta lottóvinning Íslandssögunnar – „Var að frétta að Sigríður Andersen hafi verið að vinna 1,2 milljarða“

Íslendingar missa sig yfir stærsta lottóvinning Íslandssögunnar – „Var að frétta að Sigríður Andersen hafi verið að vinna 1,2 milljarða“
Fréttir
Fyrir 2 dögum

Margir hyggjast halda jól á Tenerife

Margir hyggjast halda jól á Tenerife
Fréttir
Fyrir 3 dögum

Maðurinn sem ók Angjelin segist ekki hafa vitað að hann ætlaði að myrða Armando – Geymdi tösku sem innihélt byssuna

Maðurinn sem ók Angjelin segist ekki hafa vitað að hann ætlaði að myrða Armando – Geymdi tösku sem innihélt byssuna
Fréttir
Fyrir 3 dögum

Frambjóðandi Sjálfstæðisflokksins gagnrýndur fyrir ummæli sín um drengi og athyglisbrest – „Ekki hundsvit á hvaða ADHD gengur út á“

Frambjóðandi Sjálfstæðisflokksins gagnrýndur fyrir ummæli sín um drengi og athyglisbrest – „Ekki hundsvit á hvaða ADHD gengur út á“