Það eina sem var ekki fullskapað voru munnurinn og nefið
Unglingsdrengur frá Malasíu undirgekkst nýlega aðgerð í þeim tilgangi að fjarlægja „þykkildi“ úr maganum sem reyndist svo vera tvíburabróðir hans.
Mohd Zul Shahril Saidin, sem er 15 ára, hafði verið með fóstrið í kviðnum frá fæðingu. Læknisfræðilega heitið yfir þennan afar sjaldgæfa fæðingargalla er „foetus i foetu,“ eða sem gæti á íslensku kallast fóstur í fóstri.
Fæðingargallinn lýsir sér þannig að fóstur finnst í kvið fósturs. Yfirleitt er þó ekki hægt að koma auga á gallann fyrr en etir að barnið er komið í heiminn. Samkvæmt fréttum sem birtust í malasískum fjölmiðlum um málið þá var fóstrið sem fannst í kvið tvíburabróður síns með hár, kynfæri, fót- og handleggi.
Móðir drengsins, Hasmah Ahmad, tjáði blaðamönum að henni væri mjög létt eftir aðgerðina sem gekk vonum framar. „Fóstrið sem var fjarlægt úr kvið sonar míns var með öll helstu líffæri. Það eina sem var ekki fullskapað voru munnurinn og nefið.“
Hún sagði að þeim væri mjög létt yfir því að búið væri að fjarlægja fóstrið. Sonur hennar byrjaði fjórum mánuðum áður að kvarta undan verkjum í kviðnum en í fyrstu töldu læknar að þykkildið væri æxli.
Að auki greindi hún frá því að fjölskyldan hefði haldið litla minningarathöfn og í framhaldinu látið grafa fóstrið í kirkjugarði.
Talið er að þetta gerist í einni af hverri 500 þúsund fæðingum. Það er að fóstur liggi í kvið tvíbura síns, en þangað kemst það í gegnum naflastrenginn. Þessi fæðingargalli getur verið lífshættulegur fyrir heilbrigð fóstur.
