Sjónvarpsþáttaserían Ófærð sem Ríkisútvarpið sýnir þessa dagana er magnað sjónvarpsefni. Þarna er drjúgur hluti af okkar öflugustu og reyndustu leikurum í bland við aðra sem eru óreyndari. Baltasar yfirleikstjóri Íslands ber ábyrgðina. Hún hvílir á hans herðum. Hans verður hrósið eða hnjóðið, allt eftir því hvernig áhorfendur kunna að meta efnið.
Það er gaman að sjá menningarlegan hápunkt Íslands á ríkissjónvarpsstöðinni. Serían er mögnuð saga og vonandi heldur hún allt til enda. Auðvitað eru þættirnir umdeildir, en það er alltaf og vonandi verður aldrei gerð sjónvarpsþáttasería sem öllum finnst stórkostleg.
Til að njóta Ófærðar í botn er nauðsynlegt að hengja sig ekki í smáatriði, miklu frekar að halla sér aftur og njóta sögunnar. Að sjálfsögðu eru göt í handritinu en þau eru minniháttar og bara hluti af því að auka umtal og skoðanaskipti um þættina.
Ríkissjónvarpið færist skör ofar með þessum þáttum. Þarna uppfyllir það hlutverk sitt og gott betur. Baltasar Kormákur sannar líka í enn eitt skiptið að hann veldur verkefnum af stærstu gerð og það á hvaða sviði sem er.
Blessunarlega hefur verið ákveðin gróska í framleiðslu sjónvarpsþátta síðustu ár. Þar má horfa til vandaðrar framleiðslu á borð við þáttaraðirnar Pressu og Rétt. Ófærð ber hins vegar höfuð og herðar yfir annað efni sem boðið hefur verið upp á úr smiðju íslenskra höfunda og leikstjóra.
Svona gæðaefni í skammdeginu er ómetanlegt. Það eru líka ómælanleg listræn margfeldisáhrif af seríu sem þessari. Að sama skapi verður til dýrmæt reynsla á öllum þeim sviðum sem snúa að kvikmyndageiranum.
Það ber líka að þakka Ríkisútvarpinu fyrir að takast þetta risavaxna verkefni á hendur. Ófærð og sambærilegt efni gæti einmitt verið sá björgunarhringur sem þörf er á fyrir „línulega dagskrá“ sjónvarps. Það verða til gæðastundir á heimilum landsins fyrir framan sjónvarpið. Það er mikilvægt fyrir alla aðila.
Vel gert Baltasar og áhöfn. Vel gert Ríkisútvarp.
