Það getur reynst ansi erfitt að halda öllum boltum á lofti með stækkandi fjölskyldu. Skyndilega þarf að þvo þvott af öllum sem búa á heimilinu, sjá til þess að allir fari saddir að sofa, passa að heimilið sé þokkalega hreint ásamt því að sinna starfi.

Með stækkandi börnum bætist við meiri þvottur, keyrsla í íþróttir og tómstundir, heimanám ásamt fleiru sem þarf a sinna vel á hverjum degi.

Sjálf er ég með tvö leikskólabörn og erum við foreldrarnir bæði í krefjandi störfum sem oft þarf að sinna utan hins „eðlilega“ vinnutíma.

Ákvað ég því að setja saman þrifalista sem ég gæti prentað út og haft aðgengilegan fyrir alla heimilismeðlimi í þeirri von um að geta sett smá skipulag á þá hluti sem þarf að sinna á heimilinu án þess að það væri of yfirþyrmandi.

Oft geta nefnilega heimilisþrifin virst rosalega yfirþyrmandi þar sem maður á það til að vilja gera allt í einu en með þessum lista ætti að vera hægt að skipuleggja hvert rými fyrir sig, halda heimilinu nokkuð hreinu án þess þó að keyra sig í þrot.

Daglega þurrka ég sjálf af eldhúsborði og eldhúsbekk eftir að hafa útbúið kvöldmat en þá daga sem ég set það inn í listann ætla ég að þrífa það extra vel. Á miðvikudögum ætla ég að þrífa ísskápinn og ruslaskápinn, þó ekki bæði í sömu vikunni enda er alveg nóg að þrífa það á tveggja vikna fresti svo þá viku sem ísskápurinn er þrifinn þá fær ruslaskápurinn að bíða þar til vikuna eftir og svo framvegis.

Sjálf langar mig til þess að geta átt helgarnar nokkurnvegin lausar við þrif og því set ég þær ekki á listann en að sjálfsögðu þríf ég lítillega um helgar líka ef þess þarf.