Tímaritið Variety færir aðdáendum Game of Thrones-þáttanna á HBO hugsanleg gleðitíðindi í dag. Heimildir blaðsins herma nefnilega að áttunda og síðasta þáttaröðin af GOT tákni ekki endilega endalok vörumerkisins. Variety greinir frá því að HBO hafi ráðið til sín fjóra handritshöfunda til að skrifa hugsanlega aukaafurð (e. spinoff) út frá þáttunum vinsælu.

Áttunda þáttaröðin af GOT verður sýnd á næsta ári en aukaafurð myndi gera HBO-sjónvarpstöðinni kleift að halda lífi vörumerkinu. Skiljanlega er áhugi fyrir því enda um að ræða vinsælustu þáttaröð HBO frá upphafi. Heimildir Variety herma að handritshöfundarnir séu ekki undir neinni tímapressu og fái allan þann tíma sem þeir þurfi til að skrifa handrit að þáttum sem myndu „kafa dýpra í mismunandi tímabil í umfangsmikinn ævintýraheim George RR Martin“ eins og það er orðað.