Óskarsverðlaunaleikkonurnar Cate Blanchett, Sandra Bullock og Anne Hathaway leika saman í myndinni Ocean’s Eight en segja má að myndin sé tilbrigði við Ocean’s myndirnar, Ocean’s eleven, Ocean’s twelve og Ocean’s Thirteen, en þar fóru George Clooney, Brad Pitt og aðrir föngulegir karlmenn með aðalhlutverkin. Helena Bonham Carter og Rihanna eru einnig í leikhópnum en myndin skartar leikkonum í öllum helstu hlutverkum. Leikstjóri er Gary Ross sem hefur meðal annars leikstýrt myndunum Seabiscuit og Hungurleikunum. Steven Soderbergh, sem leikstýrði Ocean-þríleiknum er meðal framleiðenda myndarinnar ásamt George Clooney sem lék einmitt Danny Ocean í þríleiknum vinsæla. Í Ocean’s Eight fer Sandra Bullock með hlutverk systur Danny Ocean. Bullock og Clooney er vel til vina og léku saman í hinni frábæru mynd Gravity. Talið er að Clooney hafi mælt með Bullock í aðalhlutverkið í Ocean Eight. Lítið hefur frést af söguþræði myndarinnar annað en að þar er fjallað um rán. Kvikmyndatökur munu hefjast í október.
