Elísabet Jökulsdóttir skáld mun lesa upp úr verkum sínum í síðasta skipti föstudaginn 8. mars í Iðnó. Þar fer fram viðburðurinn Nornaseiður á vegum Rauða skáldahússins í tilefni af Alþjóðadegi kvenna. Konur munu sjá um alla dagskrána, þar á meðal tónlistarkonurnar Skaði og ÍriiS og spákonan Snæugla.

Elísabet mun lesa ljóð upp úr bókinni Enginn dans við Ufsaklett og verður upplesturinn lesinn samhliða af enskum þýðanda. „Svo hef ég ekki ákveðið nákvæmlega hvað ég mun gera, það ræðst ekki fyrr en svona klukkutíma fyrir sýninguna.“

Viðburðurinn er gerður að fyrirmynd frá New York, sem ber heitið The Poetry Brothel, og gengur út á einkalestur.

„Allt Iðnó verður undirlagt. Þarna verða eldgleypar og fólk í búningum og með grímur. Orkubomban Nanna Gunnarsdóttir sér um þetta og tekur á móti öllum. Hún hefur áður séð um Fringe Festival í Reykjavík.“

Leiði uppretta afreka

Af hverju verður þetta þinn síðasti upplestur?

„Ég hef verið að lesa í þrjátíu ár. Uppi á fjöllum, í Akraborginni, elliheimilum, í flugvélum og úti um allt. Ég ákvað að það væri kominn tími til að breyta til. Ég hef áður fengið þessa tilfinningu, í upplestri í MH, þá ákvað ég að kveikja í bókinni og lesa á meðan hún brann. Maður á að taka mark á þessum tilfinningum. Leiði getur verið uppspretta mikilla afreka.“

Hvað tekur við hjá þér?

„Ég fer á bókamessu í Póllandi þar sem það var verið að þýða Engan dans við Ufsaklett á pólsku. Svo ætla ég að dvelja þar í tveggja vikna fríi. Síðan er ég að skrifa nýja bók sem gefin verður út á þessu ári, um samband mitt við pabba og sjálfa mig. Það eru náttúrlega allir búnir að fá leiða á þessari fjölskyldu sem er alltaf að skrifa um Jökul Jakobsson. En ég mun pönka þetta upp og síðan brenna upplagið,“ segir Elísabet og hlær. „Og dansa í öskurústunum.“