Verur hafsins á sýningu í Reykjanesbæ
„Verkin mín hafa ætíð verið tengd vatnsflæðinu og óendanleikunum eins og hringrás lífsins,“ segir listakonan Elísabet Ásberg. Hún opnaði sýninguna Glyttur á Ljósanótt sem stendur yfir núna um helgina í Reykjanesbæ. Sýningin er í salnum Gryfjan í Duushúsum og stendur til 15. október næstkomandi.
Elísabet ólst upp í bænum til 16 ára aldurs og þó að hún sé löngu flutt í burtu segir hún að henni þyki alltaf vænt um sinn heimabæ og langaði að sýna nýja listaverkalínuna í fyrsta sinn þar.
„Í ár eru tímamót hjá mér, ég er orðin fimmtug og þar sem ég hélt ekki upp á afmælið, langaði mig að sýna nýju línuna í staðinn. Þau eru ný fæðing, nýtt upphaf. Ég er alltaf Keflvíkingur þó ég búi ekki lengur hér, og alltaf þegar ég kem hingað þá er vel tekið á móti mér og ég fæ svo mikinn stuðning. Hann hjálpar mér alltaf í verkum mínum, bæði áður og einnig núna á þessum tímamótum.“
„Glyttur fókusar á verurnar sem búa í hafinu. Þetta er minn huglægi sjávarheimur,“ segir Elísabet. „Við og þær deilum þessari jörð, en búum í sitt hvorum heiminum. Þær geta ekki búið í okkar heimi, né við í þeirra, þannig að það er gaman að skyggnast í þeirra heim. Þetta eru mínar marglyttur, ígulker, straumar og slíkt.“
Sýningin var ár í vinnslu og var unnin með hliðsjón af salnum sem hún er sýnd í, Gryfjunni. „Í honum er allt svart og hann var eins og búinn til fyrir mig, ég elska svart og að stíga inn í salinn, er eins og að stíga inn í annan heim.“
Ómur hljómar á sýningunni, eins og gestir séu undir sjónum. Og auk verkanna er hægt að sjá myndband með Elísabetu þegar hún verkin fyrir sýninguna.
„Ég hef alltaf verið heilluð af vatninu,“ segir Elísabet. „Ég er fiskur, ég átti bæði börnin mín í vatni og tók engin lyf, vatnið var „lyfin“ mín og ég trúi að vatn sé mjög heilandi fyrir mann.“
