David Beckham sést bregða fyrir í nýjustu kvikmynd vinar síns, Guy Ritchie, King Arthur; Legend of the Sword. Stikla úr myndinni var nýlega sýnd opinberlega en þar sést Beckham, sem er í hlutverki skylmingakappa, skiptast á nokkrum orðum við Arthur konung þegar sá síðarnefndi ætlar að draga sverðið Excalibur úr steininum.

Þetta stutta atriði fór illa í marga netverja sem létu svívirðingar dynja á Beckham og sögðu að hann gæti ekki leikið. Leikstjórinn Guy Ritchie fékk það líka óþvegið fyrir að hafa plantað þessum stórvini sínum í myndina. Prúðari netverjar létu einnig í sér heyra en þar var tónninn öðruvísi því þeir óskuðu Beckham til hamingju með frumraun sína í kvikmyndaleik og sögðust hlakka til að sjá myndina.

Með aðalhluverk í myndinni fara Charlie Hunnam, Eric Bana og Jude Law. Hunnam hrósar Beckham fyrir þá fagmennsku sem hann segir einkenna hann. Hann segir Beckham vera mann sem taki vinnu sína mjög alvarlega og að hann hafi lagt sig verulega fram meðan á upptökum stóð. Leikstjórinn Ritchie hefur einnig komið Beckham til varnar og segir hann hæfileikaríkan leikara.