Khloé Kardashian heitir ekki lengur Khloé Odom Kardashian. Í vikunni fékk raunveruleikastjarnan nýtt vegabréf og ökuskírteini þar sem hún heitir einfaldlega Khloé Kardashian. Þar með ber hún ekki lengur eftirnafn fyrrverandi eignmanns síns Llamar Odom.
Khloé og Llamar eiga skrautlegt hjónaband að baki en lögskilnaður þeirra gekk formlega í gegn í október 2016. Í tilefni þess að Khloé fékk nýtt ökuskírteini lét aðstoðarkona hennar baka köku með mynd af ökuskírteininu.
Khloé og Lamar giftu sig árið 2009. Khloé sótti fyrst um skilnað í lok ársins 2013 vegna framhjáhalds og eiturlyfjanotkunar Lamar en það gekk illa að ná þeim skilnaði í gegn. Lamar lét sig reglulega hverfa í einhvern tíma, vildi ekki skrifa undir pappírana og var á slæmum stað í lífinu.
Í október árið 2015 hætti Khloé þó við skilnaðinn eftir að Lamar fannst meðvitundarlaus á vændishúsi. Hann var í dái í fjóra daga og var vart hugað líf og tók því Khloé allar ákvarðanir er tengdust umönnun hans, enda skráð eiginkona hans. Svo virðist sem Khloé ætlaði að taka eignmann sinn til baka eftir atvikið en þegar hann tók upp fyrri hegðun lét hún hann endanlega flakka.
