Dúett sem kallar sig Vandræðaskáld sló í gegn í haust með eftirminnilegu myndbandi um óbeit á Lánastofnun íslenskra námsmanna, LÍN. Vandræðaskáldin hafa nú sent frá sér nýtt lag þar sem árið 2016 er gert upp. Myndbandið hefur, eins og hið fyrra, vakið mikla athygli en þegar þetta er skrifað hefur það fengið 111 þúsund áhorf.

„Við erum alltaf að semja eitthvað og flytja og höfum verið að skemmta í margs konar veislum og uppákomum,“ segir Sesselía í samtali við DV, spurð hvort aðdáendur megi eiga von á fleiri tónverkum frá Vandræðaskáldum en á Facebook-síðu þeirra má finna fleiri skemmtileg myndbönd.

Eins og flestum er ljóst gekk mikið á á nýliðnu ári. Fjöldinn allur af heimsþekktum listamönnum féll frá og pólitíkin var fyrirferðamikil bæði hér á Íslandi og í útlöndum. Þessu má öllu finna stað í textanum. „Heimtuðum kosningar, rifinn var kjaftur, en kusum samt sömu flokkana aftur,“ er á meðal þess sem fram kemur í textanum. Þá fær Sigmundur Davíð Gunnlaugsson pillu. „Simmi var fenginn í samtal á RÚV, þau sögðu satt, það var dirty múv.“

Vandræðaskáldin eru Sesselía Ólafsdóttir, leikkona og leikstjóri, og Vilhjálmur B. Bragason, leikskáld og rithöfundur. Sesselía er menntuð í leiklist og leikstjórn og þá hefur Vilhjálmur lokið MA gráðu í leikbókmenntum og leikritun frá RADA í Bretlandi. „Við námum í London og syngjum dálítið um eigin reynslu, blandið öðrum sögum frá vinum okkar og smá skáldaleyfi,“ sagði Sesselía í samtali við DV í október. Myndbandið má sjá hér að neðan.