Tónlistarveitan Tidal, sem er í eigu rapparans Jay-Z, tapaði rúmum þremur milljörðum króna á síðasta ári. Tidal, sem fór í loftið fyrir tæpum tveimur árum, virðist vera að láta í minni pokann fyrir stærri tónlistarveitum á borð við Spotify og Apple.

Jay-Z keypti tónlistarveituna Wimp árið 2015 af sænska fyrirtækinu Aspiro og breytti þá nafni veitunnar í Tidal. Rapparinn fékk til liðs við sig marga stóra tónlistarmenn, sem voru kynntir sem meðeigendur fyrirtækisins. Á meðal þeirra voru t.a.m. eiginkona Jay-Z, sönkonan Beyonce, Rihanna, Kanye West, Madonna, Chris Martin og margir fleiri. Markmið hópsins var að taka yfir tónlistarveitubransann og steypa stærri fyrirtækjum af stóli, þar sem þau töldu að greiðslur til listamanna, vegna spilunar á veitunum, væru of lágar.

Þrátt fyrir að notendum veitunnar hafi fjölgað töluvert upp á síðkastið, þá virðist slagurinn gegn stærri tónlistarveitunum vera býsna erfiður. Í það minnsta greinir Wall Street Journal frá því, að Tidal hafi tapað rúmum þremur milljörðum íslenskra króna, á síðasta ári. Þá hafa ógreiddir reikningar fyrirtækisins hrannast upp, en þrátt fyrir það, segja talsmenn fyrirtækisins, að þeir séu bjartsýnir á að fá inn nýtt fjármagn, til þess að halda fyrirtækinu gangandi.