Fjölmiðlar landsins hafa keppst um að fá að taka viðtal við stórstirnið Justin Bieber vegna tónleika hans hér á landi. Þar komast færri að en vilja. Rúnar Freyr Gíslason hefur fyrir hönd tónleikahaldara haft milligöngu um samskipti fjölmiðla. Svar við umsóknum barst nýlega þar sem fram kom að Bieber myndi engin viðtöl veita. Það kom þess vegna skemmtilega á óvart þegar Vísir birti frétt þess efnis að fjölmiðilinn hefði landað viðtali við poppstjörnuna. Það var Guðrún Jóna Stefánsdóttir, blaðamaður Fréttablaðsins, sem hreppti hnossið, en hún er unnusta Rúnars Freys.
