„Ég er mikill fluguveiðimaður og mjög upptekinn af því að veiða á sumrin og mig langaði til að kynna áhugamálið fyrir nemendum mínum,“ segir Kjartan Örn Haraldsson, umsjónarkennari við Háaleitisskóla og veiðiáhugamaður, um valfagið Fluguveiði sem verður kennt í unglingadeild skólans í vetur.

Kjartan kenndi áfangann einnig í fyrravetur og fengu þá nemendur að kynnast fluguveiðinni. Lærðu þeir að hnýta þá ýmsu hnúta sem tengjast veiðinni, æfðu sig í að kasta flugunni og lærðu um helstu ár og vötn landsins. Áfanginn endaði þá á veiðiferð í Elliðavatn í Reykjavík.

„Við hittumst þar nemendur og foreldrar og veiddum þar í smá tíma. Allt í boði Veiðikortsins. Ég hef aldrei fengið jafn mikið af viðbrögðum frá öllum pöbbunum. Þeir voru ótrúlega duglegir að hafa samband og spyrjast fyrir um þetta og svo voru nokkrir sem komu með okkur í veiðiferðina,“ segir Kjartan.

Nemendur sem velja fluguveiði þurfa að sitja tvær kennslustundir á viku. Áfanginn er að sögn Kjartans eingöngu kenndur á vorönn.

„Svo sækirðu um þetta og kemst inn eða ekki. Þetta fer eftir fjölda en í fyrra var ég með um 20 nemendur í þessu fagi. Þetta var vinsælt,“ segir Kjartan.