Fáir rithöfundar njóta meiri velgengni en bandaríski spennusagnahöfundurinn James Patterson. Hann er orðinn 69 ára og hefur á ferlinum selt rúmlega 350 milljónir eintaka af bókum sínum. Áður en fyrsta bók hans kom út árið 1976 höfðu þrjátíu bókaforlög hafnað handritum hans.

Í nýlegu viðtal við Sunday Times segir Patterson frá erfiðum árum þegar ástkona hans greindist með heilaæxli. Þau voru saman í fimm ár og í tvö og hálft ár var hún dauðveik. „Eftir að hún veiktist gat ég ekki skrifað,“ segir Patterson. „Ég grét á hverjum degi í tvö og hálft ár og í ár eftir að hún lést.“ Patterson gekk seinna í hjónaband, þá 49 ára, og á einn son með konu sinni. Hann segir þau hjón mjög náin. „Ég segi syni mínum að við séum vön að haldast í hendur þegar við leggjumst til svefns.“

Patterson segir velgengnina ekki hafa breytt sér en hann gefur stóran hluta af tekjum sínum til góðgerðarmála. „Mér líður vel í eigin skinni, ég vildi að það hefði verið þannig áður,“ segir hann. Patterson kvartar helst undan því að geta ekki lengur lesið jafn mikið og áður en hann var vanur að lesa fimm bækur á viku. Hann situr við skriftir flesta daga og fær ótal hugmyndir en hefur ekki tíma til að vinna úr þeim öllum sjálfur og starfar því oft með öðrum höfundum. Þekktasta sköpunarverk Patterson er lögreglumaðurinn Alex Cross. Fjölmargar af bókum Patterson hafa ratað á hvíta tjaldið eða orðið að sjónvarpsþáttum.