Svo virðist sem 15 mánaða ástarsambandi poppstjörnunnar Taylor Swift og skoska plötusnúðsins Calvin Harris sé lokið. Sögusagnir hafa verið í gangi um sambandsslitin síðustu daga.

Í dag greinir bandaríski slúðurfréttarisinn TMZ frá því að staðfesting hafi fengist á því að þau séu hætt saman.

Taylor og Calvin voru í miklu eftirlæti hjá slúðurpressunni um allan heim. Að auki voru þau dugleg við að setja hversdagslegar myndir af sér á Instagram.

Parið fyrrverandi opinberaði samband sitt á Billboard verðlaunahátíðinni árið 2015. Enn hefur ekkert verið gefið upp opinberlega varðandi ástæður skilnaðarins. Sambandsslitin hafa komið aðdáendum þeirra í opna skjöldu en allt virtist í himnalagi þegar þau héldu upp á eins árs sambandsafmælið fyrir nokkrum vikum.