Rokkarinn Ronnie Wood, gítarleikari The Rolling Stones, varð faðir í gærkvöldi. Eiginkona hans, Sally Humphreys, fæddi þá heilbrigða tvíbura, tvær stúlkur og heilsast öllum vel.

Ronnie Wood er ekki dauður úr öllum æðum, en hann er 68 ára, fæddur árið 1947, en Sally er nokkuð yngri, eða 38 ára. Fyrir átti Ronnie fjögur börn. Þeirra elstur er Jesse sem er fæddur árið 1976.

Ronnie er einn dáðasti gítarleikari samtímans en hann hefur verið meðlimur í The Rolling Stones frá árinu 1975. Áður spilaði hann með hljómsveitinni The Birds. Að gefnu tilefni skal tekið fram að ekki er verið að tala um hljómsveitina The Byrds heldur aðra, minna þekkta sveit sem starfaði á árunum 1964 til 1967.