Eignmaður Celine Dion, René Angélil, var aleinn þegar hann lést en hann hafði óskað þess að vera í örmum eiginkonu sinnar á dánarstundinni. Söngdívan greinir frá þessu í opinskáu viðtali.

Þar kemur jafnframt fram að hjúkrunarfræðingur hafi fundið René látinn snemma morguns þann 13. janúar síðastliðinn. Þá lá hann á gólfinu í svefnherbergi sínu en talið er að René hafi fallið á gólfið skömmu áður en hann lést. En líkt og áður hefur komið fram þá var banamein René krabbamein í hálsi.

Kvöldið áður var Celine með tónleika og í stað þess að kíkja inn til hans, kyssa hann á ennið og breiða yfir hann líkt og hún var vön að gera á hverju einasta kvöldi fór hún beint að sofa þessa nótt.

„Ég kom svo seint heim og vildi ekki vekja hann. Hann var búin að ákveða að deyja í örmum mínum. Þess í stað féll hann á gólfið þegar hann var að reyna að reisa sig við og var aleinn þegar hann lést,“ segir Celine í samtali við franska tímaritið Paris Match.

Hún kveðst sömuleiðis hafa verið gagntekin af þessum hugsunum fyrstu dagana. Að auki var hún með miklar áhyggjur af því að hann hafi slasast við fallið og verið þjáður á meðan hann dó.

Læknir staðfesti síðar að René hafi hvorki verið með brákuð né brotin bein og hvergi væri að finna ummerki um blæðingar. Celine segist sjá það núna að það sé gott að hann þurfi ekki að þjást meira. Hún sé þannig búin að sætta sig við að hann sé farinn.