Celine Dion hélt hjartnæma ræðu í á Billboard tónlistarverðlaunahátíðinni í gærkvöldi. En þetta er í fyrsta skiptið sem hún kemur opinberlega fram síðan eiginmaður hennar, René Angélil lést úr krabbameini fyrir fjórum mánuðum.

Celine tók á móti heiðursverðlaunum fyrir framlag sitt til tónlistarinnar en þetta er aðeins í fjórða skipti sem slík verðlaun eru afhent á hátíðinni. Tónlistarmennirnir sem hafa áður hlotið verðlaunin eru Neil Diamond, Stevie Wonder, Prince og Jennifer Lopez.

Áður en Celine tók á móti verðlaununum flutti hún ábreiðu af Queen slagaranum The Show Must Go On. Lagið tileinkaði hún René og út frá orðum hennar má túlka að nú taki við nýtt líf.

Elsti sonur Dion, René-Charles, kom móður sinni á óvart, þegar hann steig á svið og veitti henni verðlaunin. Eftir nokkur tilfinningaþrungin augnablik bað hún hann um að standa við hlið sér á meðan hún flutti þakkaræðuna. Þar sagði hún meðal annars:

„Ég vil vera sterk fyrir fjölskylduna mína. Þrátt fyrir að René sé farinn þá veit ég að hann vakir yfir mér og börnunum.“

Myndskeið af ræðu söngkonunnar má sjá hér fyrir neðan en ræðan hefst eftir 30 sekúndur:

[youtube https://www.youtube.com/watch?v=m2VKgkjLKwM&w=640&h=360]