Glæpasagnahöfundurinn Michelle McNamara, eiginkona bandaríska gamanmyndaleikarins Pattons Oswalt, varð bráðkvödd aðfaranótt föstudags.

Michelle lést í svefni, en ekki liggur fyrir hvað varð henni að aldurtila.

Michelle, sem var 46 ára, stofnaði vefsíðuna True Crime Diary þar sem fjallað var um sakamál, gömul og ný, frá öllum hliðum. Síðustu æviárunum varði hún í að halda vefnum úti.

Eiginmaður hennar, Patton Oswalt, er þekktur leikari og uppistandari, en hann hefur einnig unnið að talsetningu barnamynda, til að mynda Ratatouille. Þá hefur hann leikið í fjölda sjónvarpsþátta í gegnum árin, til að mynda King of Queens.

Michelle og Patton gengu í hjónaband árið 2007 og eignuðust eina dóttur sem í dag er sjö ára.