Sex særðust við að reyna að klófesta hlébarða sem birtist skyndilega í skóla í borginni Bangalore í Indlandi á sunnudag. Um tíu tíma tók að handsama dýrið en á meðal þeirra sem særðust voru vísindamaður, myndatökumaður og starfsmaður skógræktar. Talið er að stofn hlébarða telji á bilinu 12 til 14 þúsund dýr í Indlandi en uppákomur sem þessar verða sífellt algengari, enda er sífellt þrengt að búsvæðum dýranna.

Hlébarðinn, sem spásseraði inn á skólalóðina í Vibgyor International School, var átta ára gamalt karldýr. Í tíu klukkustundir reyndu menn að króa dýrið af og deyfa. Þau áform báru loks árangur og var hlébarðinn fluttur út í skóg þar sem honum var sleppt. Upptökur úr eftirlitsmyndavélum sýna glöggt hvernig dýrið réðst á þá sem fyrir því urðu, en BBC greinir frá.

Skólinn er staðsettur í nágrenni skógar og þaðan er dýrið talið hafa komið. „Það var þrautin þyngri að ná honum. Jafnvel þó að hann hafi verið skotinn með deyfilyfi náðum við honum ekki fyrr en um korter yfir átta um kvöldið, þegar lyfið hafði náð fullri virkni,“ sagði lögreglumaðurinn S. Boralingaiah við fréttamenn.
Fólkið slasaðist ekki alvarlega.