Breskir fjölmiðlar greina frá því að tónlistarmaðurinn George Michael, sem lést á jóladag, hafi glímt við eiturlyfjafíkn áður en hann lést. Heimildarmaður breska blaðsins Telegraph, sem sagður er nákominn tónlistarmanninum, segir að hann hafi notað heróín áður en hann lést.

Talið er að George Michael, sem var 53 ára, hafi látist af völdum hjartaáfalls. Þetta sagði fyrrverandi umboðsmaður hans, Michael Lippman, við breska fjölmiðla í gær.

Gary Farrow, einn þekktasti almannatengill Bretlands og góður vinur tónlistarmannsins, segir við Sun að George Michael hafi glímt við eiturlyfjafíkn um það leyti sem hann lést.

„Ég held að auðvelt aðgengi að eiturlyfjum hafi valdið honum vandræðum. Ég taldi að George væri of skynsamur til að nota ólögleg efni en um leið og fíknin nær tökum á þér er erfitt að berjast við hana,“ sagði hann.

Breska blaðið Telegraph hafði eftir heimildarmanni sínum að Michael hefði í nokkur skipti verið fluttur á bráðamóttöku vegna inntöku heróíns.

Breska blaðið Mirror greindi frá því að Michael hafi haldið stórt partý í Highgate-glæsihýsi sínu í London aðeins örfáum vikum áður en hann lést. „George hafði gaman af því að fá vini sína í heimsókn og var oft að til morguns. Þetta hélt áfram þar til hann lést.“