Leikritið Horft frá brúnni eftir Arthur Miller var frumsýnt í Þjóðleikhúsinu um helgina og var margt um manninn á sýningunni eins og sjá má á meðfylgjandi myndum.

Horft frá brúnni er almennt talið eitt magnaðasta leikrit 20. aldarinnar en það segir frá örlögum alþýðufólks í hafnarhverfi í New York. Þetta er verk um forboðnar ástir, svik og leitina að frelsi í landi tækifæranna, eins og segir á vef Þjóðleikhússins.

Leikstjóri sýningarinnar heitir Stefan Metz og hefur hann starfað í virtum leikhúsum víða um Evrópu. Hann setti upp verkið Eldraunin í Þjóðleikhúsinu nýverið en það verk er einnig eftir Arthur Miller.

Einvala lið leikara kemur fram í Horft frá brúnni. Má þar nefna Arnar Jónsson, Hilmi Snæ Guðnason, Láru Jóhönnu Jónsdóttur, Snorra Engilbertsson og Baltasar Breka Samper.

Flott hjón Lísa Charlotte Harðardóttir og Sigurður Sigurjónsson sýndu sig og sáu aðra í Þjóðleikhúsinu um helgina. Sigurður leikur sem kunnugt er í einleiknum Maður sem heitir Ove.

Góðir vinir Ari Matthíasson þjóðleikhússtjóri og Kristbjörg Kjeld leikkona voru í góðu skapi á frumsýningunni, enda engin ástæða til annars.

Með syninum Ragnheiður Eiríksdóttir, einnig þekkt sem Heiða í Unun, lét sig ekki vanta á frumsýninguna. Hér sést hún með syni sínum, Óliver Elvarssyni.

Órakaðir og fínir Leikararnir Friðrik Friðriksson og Gunnar Hansson voru brosmildir á frumsýningunni. Báðir skarta þeir myndarlegu skeggi.