„Það er bara búið að taka úr mér gallblöðruna, gallganginn, meira en helminginn af brisinu, hluta af maganum, skeifugörnina og smágrini þarna í kring.“ Þetta segir leikarinn Stefán Karl Stefánsson í myndbandi sem eiginkona hans Steinunn Ólína Þorsteinsdóttir, setur inn á Facebook.

Stefán Karl hefur glímt við veikindi að undanförnu og hefur þurft að gangast undir flókna skurðaðgerð. Þó ýmislegt hafi verið fjarlægt úr Stefáni Karli er ljóst að menn hafa ekki tekið úr honum húmorinn.

Steinunn Ólína segir við Stefán í myndbandinu að hún ætli að halda heim á leið, en hann liggur í sjúkrarúmi. „Verður ekki allt í lagi með þig, elskan?“ spyr hún.

Stefán svarar eins og honum einum er lagið. „Jú, það verður sko allt í lagi með mig. Það er bara búið að taka úr mér gallblöðruna, gallganginn, meira en helminginn af brisinu, hluta af maganum, skeifugörnina og smágrini þarna í kring. Auðvitað verður allt í lagi með mig.“