„Það eru allir að sýna eitthvað persónulegt til að manngera sig í þessari kosningabaráttu. Ég hef reynt að halda mínum börnum fyrir utan mitt opinbera líf, þó að ég sé opin bók, þá finnst mér að börnin mín eigi rétt á sinni friðhelgi,“ segir Birgitta Jónsdóttir þingmaður Pírata á Faceebook.

Færsluna skrifar hún vegna frétta af Bjarna Benediktssyni fjármálaráðherra, en Sjálfstæðisflokkurinn birti myndband af Bjarna Benediktssyni að baka stórglæsilega afmælisköku. Myndbandið hefst á því að fjármálaráðherra birtist, íklæddur svuntu og segir einbeittur:

„Það er mikill kærleikur í svona köku, það er ekki spurning.“ Í kjölfarið sést Bjarni skera út sykurmassa í köku sem ætti undir eðlilegum kringumstæðum að vinna til einhverskonar verðlauna.

Birgitta ætlar aftur á móti ekki að birta neinar myndir af sér að baka köku. Birgitta segir:

„Þannig að ég mun ekkert vera að birta neinar myndir af mér að skreyta kökur, en hér er ein mynd af köku sem við mamma gerðum saman fyrir langa löngu þegar frumburður minn varð sex ára,“ segir Birgitta og bætir við:

„Þetta var einmitt afmælisveislan sem ég neyddist til að taka minn fyrsta yfirdrátt hjá bankanum fyrir sem var um 20.000 krónur til að geta haldið afmæli fyrir son minn.“

Þá segir Birgitta að endingu:

„Þvílíkur okurvextir sem eru af slíkum lánum, mæli ekki með því, en stundum á fólk ekki val og þarf að taka slíkt lán, því að það er ekki hægt að láta enda ná saman út mánuðinn. Gerum eitthvað magnað, dreifum arði þjóðar á auðlindum jafnar.“