Búast má við fleiri stjórnmálamönnum að gera skrítna hluti á næstu dögum
Nú styttist í kosningar og óhjákvæmilegur fylgifiskur þess eru stjórnmálamenn að láta plata sig út í allskonar vitleysu. Miskjánalega vitleysu. Hinn stóíski forsætisráðherra landsins, Sigurður Ingi Jóhannsson, er þar engin undantekning. Í nýlegum umræðuþætti um kosningamál Framsóknar á Hringbraut hlóð Sigurður Ingi í eitt „dab“ ásamt Karli Garðarssyni, alþingismanni, og Páli Marís Pálssyni, formanni Félags Ungra Framsóknarmanna.
Á Facebook-síðu FUF birtist myndband af herlegheitunum og er sjón sögu ríkari. Ekki fylgdi með sögunni hvort að þremenningarnir hafi neglt „dabið“ í fyrstu töku eða hvort margar tilraunir hafi þurft til.
Fyrir þá sem hafa búið í helli undanfarið ár þá er „dabið“ geysivinsælt dansspor sem skaust fram í sjónarsviðið þann 15.nóvember 2015 þegar NFL-leikmaðurinn Cam Newton fagnaði snertimarki með þessari tiltekningu danshreyfingu. Því má segja að Newton hafi verið það fyrir „dabið“ sem Íslendingur eru fyrir víkingaklappið. Uppruni dabsins er þó á huldu en þó er talið að rekja megi rætur þess til rappsenu Atlantaborgar.
